ويعد اساس العمل المحاسبى فمعرفتك التوجيه المحاسبى للعمليات المحاسبه بطريقه صحيحه تعنى النجاح فى اتمام العمل ولذلك سوف ناقش معنا نظرية القيد المزدوج
double thoery ( debit , credit )
الاول لازم نعرف ان الحسابات نوعين دائمة ومؤقتة
الدائمة : هى حسابات الميزانية لانها مستمرة ولا تخص فتره بعينها فهى حسابات مفتوحة تتحرك لاعلى واسفل على حسب المعاملات المالية خلال السنه ويبقى لها رصيد يتم ترحيله للسنه التالية
المؤقتة : هى حسابات قائمة الدخل علشان هى بتخلص وتتقفل لكل فتره ومش مستمرة زى الميزانية وبالتالى تاخد مرتبة الدرجه الثانية وتبقى اسمها مؤقتة
ليه انا بذكر الكلام ده لان نظرية القيد المزدوج اصلا اتعملت للحسابات الدائمة بس
طيب والحسابات المؤقتة حصل عليها بعد كده تعديل ولكن اصبحت شاذة فى التسجيل
وذلك لان الحسابات الدائمة فقط اللى تخضع لنظرية المدين والدائن والحسابات المؤقتة اللى هى الايرادات والمصروفات هى مكمله فى القيد كشكل فقط والمقدمه دى هتسهل علينا كتير لما نفهم ليه اتعمل المدين والدائن كده وايه السبب
فكره نظرية المدين والدائن فى الاساس هى فكره مقايضة يعنى هات وخد
فاصبح اللى بياخد اسمه المدين واللى بيعطى اسمه الدائن
يعنى المدين اخذ فلوس فاصبح مديون بيها وفى اللفظ اتلغى حرف الواو لانه لفظ مبنى للمجهول ولازم حرف العله يتحذف لاتقاء ساكنين وده مش موضوعنا علشان بس اعرفك كلمه مدين اصلها ايه هى اصلها مديون يعنى Debit
اما الدائن ده اصبح دائن باللى اعطاه للمدين
يعنى الفكره هى فكره مقايضة بحته
نرجح نكمل شرح
نيجى للحسابات الدائمة
بصوا الشركه شخصية اعتبارية يعنى منفصله عن صاحب الشركة لو كانت منشأه فردية وعن الشركاء لو كانت منشأه تضامن وعن المساهمين لو كانت شركة مساهمة
يعنى الشركة لها شخصيتها المنفصله يعنى تعتبرها واحد بس مش بنى ادم يعنى اعتباريا نعتربها واحد علشان كده سموها شخصية اعتبارية
يعنى اللى اخذته وزاد اصبحت الشركه مدينه بيه للمالك
يعنى كل الاصول اللى زادت فى الشركة
الشركة نفسها مدينه بيه لصاحب الشركة نفسه علشان كده خلو الاصول كامله حسابات مدينه
طيب والدائن
قسمو الدائن لاثنين دائن من بره الشركة وهما الدائنون والموردين واوراق الدفع والقروض والسندات وسحب بنك على المكشوف اللى هما دائنين الشركة من بره
اما الدائن التانى هو صاحب الشركه ودينه يتمثل فى رأس المال علشان كده دائما رأس المال فى الجانب الدائن علشان هو دين على الشركة لصاحب الشركة
ليه سمو الخصوم بهذا الاسم لانهم خصم الشركه فى الدين
يعنى نوصل بكده الاصول مدينه والخصوم دائنة بما فيهم رأس المال
ليه بقى خلو الاصول فى اليمين لو الميزانية بالعربى وعلى الشمال لو الميزانية بالانجلش لانها بصراحه ممتلكات الشركة ودايما هيظهرها فى اول السطر علشان يظهر قوه الشركة الاول . بس كده
طيب نيجى للحسابات المؤقتة اللى ظهرت بعد الحسابات الدائمة واللى معالجتها شاذه شويه
هنا قالك ان المصروفات كلها بالكامل مدينة والايرادات بالكامل دائنة وده شاذ على النظرية لان المصروف تسبب فى ان الحساب نقص مش زاد وان الايراد تسبب ان الحساب زاد مقلش بالتالى العكس
قالك لا دى حسابات مؤقتة يعنى تعمل عمل المكمل للحسابات الحقيقية
يعنى لما النقدية تقل اكيد هتبقى فى الدائن لانها اعطت فتاخذ صفه الدائن
فمين يكون المدين قالك خلاص نحط الحساب اللى تسبب فى ده يبقى نحط المصروف فى المدين علشان كده سموه مؤقت لانه موقعه ليس دائم وليس له رصيد الا لو كان مستحق او مقدم وبكده يكون حساب ميزانية فمجازى يبقى فى المدين
فهيبقى القيد
من ح / المصروف
ال ح / النقدية
كده انت دفعت فلوس
طيب لو اخذت فلوس ايراد
من ح / النقدية
ال ح / الايراد
هنا الايراد وصف العملية بموقعه فى الدائن
طيب ايه هى كلمه من حساب وكلمه الى حساب اللى واجعه دماغنا دى
الفكره المدين لما اخذ بقى عليه فلوس ومدين بيها
فمن حساب دى اختصار لجمله ( مطلوب منه حساب )
وكلمه الى حساب اختصار جمله ( مطلوب إليه حساب )