--> content="c4696a06fad95497ae378dd827b45a12"
اتعلم محاسبه

آخر الأخبار

اتعلم محاسبه
كتب محاسبيه
جاري التحميل ...
كتب محاسبيه

اتعلم مراجعه - الدرس الثالث - قبول عميل جديد و إجراء التخطيط المبدئى Accept client and perform initial planning



لما أنت بأذن الله يكون عندك مكتب مراجعة و يجيلك عميل طالب من حضرتك تقدمله خدماتك
هتقبل العميل و خلاص و لا لازم يكون فى شوية قواعد و سياسات بتمشى عليها أكيد مش هتقبله و خلاص لازم يبقى فى أسس عشان نشوف هنقبل العميل ده و هنقدر نقدمله الخدمة و لا لأ طب أيه يا باشا شوية الأسس و القواعد دى؟

Step : 1- قبول عميل جديد و إجراء التخطيط المبدئى  

 Accept client and perform initial planning


أول حاجة ( الإجتماع بالعميل ) هتاخد الراجل المحترم ده فى مكتبك الجميل أو فى ميتنج رووم شيك كده و ترحب بيه و تشوفه يشرب أيه و لا عايز الناس تاكل وشنا و خد دى بقى منى عادة الراجل هيطلب قهوة مظبوط
تانى حاجة ( التفهم المبدئى لنشاط العميل ) أول ما الراجل الطيب ده تجيله قهوته و ياخد أول رشفة منها يبدأ الكلام ما بينكم فى المضمون بقى و يبدأ يشرحلك هو شغال فى أيه أو شركته بتنتج أيه أو بتستثمر فى أيه أبدأ أنت أسئله أيه هى أكتر حاجة فيها مخاطر فى نشاط حضرتك عشان تبقى فاهم ال Risks المؤثرة على نشاطه
طيب حلو بعد تانى رشفة من القهوة طلع الراجل ده بره بس مش بره مكتبك عيب ده ضيفنا بردو
لأ طلعه بره موضوع شركته خالص و أبدأ أتكلم معاه عن النشاط بتاعه ده بس بوجه عام و أيه المخاطر اللى بتأثر على النشاط ككل و ده بنسميه (التفهم المبدئى لبيئة صناعة العميل و المخاطر المرتبطة بها ) يعنى الراجل ده قالك أنه شغال فى التصدير مثلا أبدأ أتكلم معاه عن التصدير بوجه عام و أيه التحديات الجديدة اللى تخص جزئية التصدير و أيه المعوقات اللى ممكن تأثر على التصدير بوجه عام و طبعا بالتالى هتأثر على نشاطه
مع ثالث رشفة تقريبا الراجل ده هيكون خلص قهوته و خد واجبه و الدنيا تمام
تبدأ بقى فى (تفهم أسباب الارتباط بالعميل) لازم تبقى عارف العميل ده محتاج خدماتك فى أيه يعنى عايز من حضرتك تقدم لشركته (مراجعة و لا فحص محدود ولا تقرير إجراءات متفق عليها و لا إقرار ضريبى و لا خدمات أخرى)
فى وسط الكلام ده أوعى تفرح أن عميل جالك المكتب هقبل أشتغل معاه و أبقى فرحان لأ
لازم يبقى فيه ( دراسة مدى تعارض المصالح ) خلينا نفهمها ببساطة شديدة أن أهم جزئية فيها أن ميكونش فى تعارض مصالح ما بين مكتبك و العميل و لازم يكون ليك إستقلالية كمراجع ، أن ميكونش فيه تعارض مصالح بين الإدارة و معدين القوائم المالية بعد كل الكلام ده ممكن تقول للعميل ( نص مبروك )

بعد نص مبروك دى تقدر تتكلم فى الأهم معاه

( تحديد نطاق العمل ، توقيت ، أتعاب المراجعة ) يعنى أنت شغلك و خدماتك اللى هتقدمها عبارة عن أيه (مراجعة و لا فحص محدود ولا تقرير إجراءات متفق عليها و لا إقرار ضريبى و لا خدمات أخرى ) و أيه مدى التعاون اللى هتقدمه إدارة العميل
التوقيت اللى هتبدأ أنت كمراقب حسابات تقديم خدمتك فيه و عن أى فترة مالية تخص العميل
و تحديد أتعابك طبعا ( أتعاب المراجعة) و طريقة تحصيلها
بعد ما تتفقوا على كل ده نقدر نقول مبروك للعميل و أتشرفنا بالتعاون مع حضرتك و بأذن الله نكون على قدر المسئولية و الكلمتين الحلوين اللى زى حضرتك دول نتفق مع العميل على إعداد ( خطاب الإرتباط ) بين مكتبك و بين العميل
يبقى أخر مرحلة هى ( إعداد خطاب الإرتباط مع العميل ) قبل ما نشرح الحتة دى
لازم تبقى فاهم أن مهنة المراجعة دى هى خدمة بتأديها للعملاء أو الشركات بيبقى فيه أتفاق ما بينك و بين العميل حاجة كده زى " العقد " العقد ده بقى فى مهنتنا يا باشا إسمه خطاب الإرتباط
بيتحدد فيه الخدمة اللى أنت هتقدمها أو العميل عايزك تقدمهاله و توقيتها يعنى هو عايز الخدمة اللى هتقدمها دى أمتى و عن أى فترة مالية حسب أتفاقكم و مدى التعاون اللى هتقدمه إدارة العميل و بيتم تحديد الأتعاب اللى هتستفاد منها بعد تقديم الخدمة و طريقة تحصيلها و حاجة كمان مهمة زى بند مشروط كده أن المراجع لا يضمن اكتشاف اى تحريف هام ناتج عن الغش يعنى الراجل ده لو خبى عليك حاجة أو ضللك فى القوائم المالية مثلا أنتى بتخلى مسئوليتك كمراقب حسابات أو مراجع عن أى تحريف هام ممكن يحصل خلال عملية المراجعة

بعد إعداد خطاب الإرتباط مع العميل نبدأ فى إجراءات التخطيط المبدئى و أهم حاجة فى الحتة دى

( اختيار وتحديد فريق العمل ) مين من عند حضرتك هيقدر ينزل يراجع على الشركة دى و هل أنت محتاج مثلا تكون فريق عمل من ( شريك Partner و مدير مراجعة Managerأو مساعد مدير مراجعة Assistant Managerو مراجع أول Senior Auditorو 2 مساعدين مراجعة Associateأو New staff ) و هكذا حساب حجم الشركة و نطاق العمل و المطلوب إنجازه فيها
بعد ما تختار فريق العمل بتاعك تبدأ تخش على الخطوة التانية و هى
- تفهم نشاط العميل و الصناعة (Understand the client’s business and industry)
ودى هنتكلم فيها المرة اللى جاية عشان أنا المرة دى طولت عليكم بجد
السؤال #3 بيقول : العبارة التالية ( عبارة صحيحة) أم ( عبارة خاطئة ) ؟
قد يتضمن خصاب الإرتباط مع العميل بند :
* الحق غير المقيد لمراقب الحسابات فى الإطلاع على الدفاتر و السجلات و المستندات و الحصول على كافة المعلومات.
طبقا لمعيار المراجعة المصرى رقم (210) - شروط التكليف بعمليات المراجعة
⏪المقاله من اعداد ا. مصطفى السيد  محاسب ومراجع قانونى فى بيج 10  ⏩

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

احصاءات المدونة

جميع الحقوق محفوظة

اتعلم محاسبه

2016