-->
random

آخر المواضيع

random
recent
جاري التحميل ...
recent

كيفيه المعالجه المحاسبيه لكراسه الشروط قبل الحصول على المناقصه وبعد الحصول عليها ؟

لما شركتك تدخل مناقصة جديدة وتروح تشترى كراسة شروط ويجى مديرك يقولك اثبت كراسة الشروط وانت راجل لسه جديد فى الشغلانة متتخضش وروح على المصاريف العمومية والادارية وارمى عليها قيمة الكراسة بس استنى انت بتقول ايه انا شغال مقاولات يعنى عندى مصاريف عمليات وحركات انا محاسب مقاولات ياعم
هقولك لا خليك تقيل المناقصة لسه مرسيتش عليك عشان تفتح حسابات للمشروع ومركز تكلفة وتكبر دليلك بحسابات ملهاش لازمة طب قولى القيد وانجز
القيد ياعم بيقول
××× من ح/ مصروفات عمومية وادارية - كراسات شروط (حساب فرعى)
××× الى ح/ البنك او الصندوق
رسى عليك المشروع هتعمل حاجه جميلة اوى كده قيمة الكراسة اصبحت تكلفة على المشروع اللى رسى عليك هتعمل قيد لذيذ برضه وتحمل المشروع بقيمة الكراسة ازاى طيب ؟
اقولك
××× من ح/ مصاريف العمليات (عشان متزعلش بس) - مشروع الامن العام (مركزتكلفة) - كراسات شروط (نفس الحساب الفرعى)
××× الى ح/ مصروفات عمومية وادارية
ايه ده نفس الحساب الفرعى ؟
اه م انت وانت بتقسم دليلك طبيعى هيكون فيه بعض الحسابات المتشابهة اللى هتكون تحت العمومية وتحت مصاريف العمليات لازم هتفتحهم فى الاتنين
طيب انت لخبطتنى كده هو فيه مصروف يبقى دائن انت مين اللى فهمك محاسبة ؟!
اقولك اتقل انت متسرع ع فكرة :)
بص لما تحب تخفض اى حساب ايا كان طبيعته لازم يجى عكس طبيعته نقفله يعنى وده هيبان معاك فى حركة الحساب لو روحت بصيت فى حساب الاستاذ هتلاقى مرة مدين ومرة دائن ف المحصلة صفر وكده اتقفل م انت مش مجرد بترمى قيود وخلاص لازم وانت شغال تبقى عارف اثر قيودك ايه وهتسمع فين مركز مالى ولا قائمة دخل عشان تبقى محاسب فاهم كده
طيب لو المشروع بقى مرساش عليا ؟
ولا حاجه انت مش حطيتها ع العمومية والادارية خلاص متعملش حاجه المصروف هيتقفل اخر السنة وسكم بكم 😂 ولا تتعب نفسك ولا تضيع وقتك لازم تبقى محاسب برنس وتشتغل بمزاج
طيب ايه مركز تكلفة ده اللى انت كاتبه فوق ده ؟
بص مركز التكلفة ده عندك اللى هو المشاريع اللى انت واخدها وده فايدته انك تقدر تحمل عليه مصاريف وايرادات المشروع وتطلع تقارير لكل مشروع بسهولة وده ليه دليل برضه هتلاقيه فى السيستم اللى انت شغال عليه اول م بتشتغل بتعمله وفى بعض البرامج بيكون 3 مستويات :
- عام (وده بيكون فيه المنطقة مثلا معاك مشاريع فى 3 مناطق المنطقة الوسطى والشرقية والجنوبية)
- رئيسى (وده بيكون فيه المشروع نفسه بنفس اسمه وممكن تختصر اسمه لان فى الغالب الاسامى بتكون كبيرة المهم بس تقدر تميز مشاريعك)
- فرعى (وده بيكون تقسيم للمشروع نفسه مثلا عندك عدة مبانى جوه مشروع فقسم بقى المبنى الاول المبنى الثانى عيش انت)
طيب انا السيستم اللى انا شغال عليه مفيهوش التقسيمة دى لمراكز التكلفة
اقولك متزعلش لازم تبقى مرن وتمشى نفسك وتطلع نتائج بامكانيات شركتك وممكن فيما بعد تقترح عليهم برنامج بناءا على خبرتك لكن ادرسه الاول واسأل مستخدميه عن نتائجه قبل م تلبسهم فيه انت اللى بتطوع السيستم وتتحكم فيه حسب شغلك ووضع شركتك مفيش سيستم يتحكم فى محاسب بل المحاسب يقدر يطلع اخطاء وراء المبرمجين بس ده لو محاسب برنس زيك كده
طيب ياعم خلاص هو كل ده عشان سألتك عن كراسة الشروط
معلش انا رغاى شوية وبحب حاجه اسمها محاسبة ف استحملنى

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

جميع الحقوق محفوظة

اتعلم محاسبه

2023